آج ایک بار پھر عوامی مسلم لیگ کے سربراہ شیخ رشید عدالت میں پیشی کے لیے آئے اور آج انھوں نے کھل کر نواز شریف کو تنقید کا نشانہ بنایا -شیخ رشید نے کہا ہے کہ مری میں چہل قدمی کرنے سے الیکشن مہم نہیں ہوتی، انہیں لگ پتا جائے گا جب یہ عوام میں ووٹ لینے نکلیں گے۔راولپنڈی میں انسداد دہشتگردی عدالت کے باہر میڈیا سے گفتگو کرتے ہوئے شیخ رشید نے کہا کہ ہمارا اصل کیس لاہور ہائیکورٹ پنڈی بینچ میں 30 نومبر کو ہوگا، آج سرکاری پراسیکیوٹرز نے دلائل کے لیے پھر وقت مانگا ہے، ہم عبوری ضمانتوں پر دلائل کے لیے تیار تھے۔
چند روز قبل نواز شریف مری میں گاڑی لے کر سڑک پر آگئے تھے جس پر ان کے حمائتیوں نے ان کی تعریف جبکہ ان کے مخالفین نے ان پر کڑی تنقید کی تھی -اسی حوالے سے آج شیخ رشید نے بھی نواز شریف پر طنز کے نشتر چلائے -نواز شریف کا نام لیے بغیر شیخ رشید نے کہا کہ مری میں چہل قدمی کرنے سے الیکشن مہم نہیں ہوتی، انہیں لگ پتا جائے گا جب یہ عوام میں ووٹ لینے نکلیں گے۔سابق وزیر داخلہ کا کہنا تھا کہ الیکشن ہو کر رہیں گے اور شاید اسی سے کوئی بہتری آجائے، جو بھی حکومت میں آئے گا اس کےلیے معشیت بہت بڑا چیلنج ہوگا۔انہوں نے مزید کہا کہ سارا پاکستان جانتا ہے میں 9 مئی کے واقعات میں شامل ہی نہیں تھا، ایک بورڈ بٹھا دیں جو بے گناہ ہیں، ان کو کیسوں سے نکال دیں لوگوں کےحالات بہت خراب ہیں۔شیخ رشید 9 مئی کے واقعات کے بعد سے بڑی مشکل میں ہیں جس کا وہ بار بار اعتراف بھی کرچکے ہیں تاہم وہ اس بات پر ڈٹے ہوئے ہیں کہ وہ نواز شریف کے خلاف راولپنڈی کے دونوں حلقوں سے قلم دوات کے نشان پر الیکشن ہر حال میں لڑیں گے –