مسجد میں اعتکاف میں بیٹھے شخص سے چوری کے 12 سوٹ برآمد

جب انسان کا ضمیر مرجائے تو انسان وہ حرکتیں کرگزرتا ہے کہ شیطان بھی شرمندہ ہوکر اس سے پناہ مانگتا ہے -کیا کوئی سوچ سکتا ہے کہ کوئی شخص درزی کی دکان سے چیزیں چرانے کے بعد مسجد میں اعتکاف کے لیے بیٹھ جائے کہ لوگ اس پر شک نہ کریں -نجی ٹی وی اے آر وائی کے مطابق یہ واقعہ پنجاب کے ضلع لیہ کے شہر چوک اعظم میں پیش آیا ہے جہاں پولیس نے چوری کے بعد اعتکاف میں بیٹھنے والے چور کو مسجد کے اندر سے گرفتار کیا ہے۔پولیس کے مطابق دو ملزمان نے دو روز قبل ایک درزی کے دکان کے تالے توڑ کر 12 سوٹ چوری کئے تھے جن میں سے ایک ملزم بلال چوری کے بعد علاقے کی مسجد میں اعتکاف میں بیٹھ گیا تھا۔پولیس کا کہنا ہے کہ ملزم سے مسروقہ سامان برآمد کر لیا گیا ہے جبکہ اس کے دوسرے ساتھی کی گرفتاری کے لئے چھاپے مارے جا رہے ہیں۔