لاہور ہائیکورٹ کے جسٹس شاہد کریم نے لاہور میں شہریوں کی زندگیوں کی حفاظت اور شہر کو آلودگی سے بچانے کے لیے پولیس کو سڑک پر آکر قانون کی خلاف ورزی کرنےوالوں کو بھاری جرمانے کرنے کا حکم دے دیا -آج عدالت نے سموگ کے تدارک کیلئے دائر درخواستوں کا تحریری حکم جاری کردیا۔ لاہور ہائیکورٹ نے پنجاب بھر میں موٹر سائیکل پر ہیلمٹ نہ استعمال کرنے والوں کو 2ہزار روپے جرمانے اور گھروں میں گاڑیاں دھو کر پانی ضائع کرنے والوں کو 5ہزار روپے جرمانہ کرنے کا حکم دے دیا ، حکمنامہ میں گرین بیلٹس پر پارکنگ کرنے والے افراد کو 5ہزار روپے جرمانہ کرنے کا حکم دیا گیا ہے۔
عدالت نے کہاکہ ڈولفن پولیس شہر کا راؤنڈ کرے اور خلاف ورزی کرنے والوں کو قانون کے تابع لائے ، حکمنامہ میں مزید کہا گیا ہے کہ ایل ڈی اے آئندہ کوئی پروجیکٹ عدالت کی اجازت کے بغیر شروع نہ کرے، ایل ڈی اے ترقیاتی منصوبوں کیلئے محکمہ ماحولیات سے بھی ہدایات لے ۔لاہور ہائیکورٹ نے کہاہے کہ دھواں چھوڑنے والے بھٹوں کیخلاف متعلقہ افسران کارروائیاں کریں، بھٹوں کیخلاف کارروائیاں نہ کرنے والے افسران کیخلاف فوجداری مقدمات درج کئے جائیں گے،عدالت نے فیصلے میں مزید کہا ہے کہ شہر میں مزید درخت لگائے جائیں اور پرانے درختوں کو بھی محفوظ بنانے کیلئے اقدامات کئے جائیں۔لاہور کو مزید گرین بناکر آلودگی کو کنٹرول کیا جائے –