گزشتہ سال طوفانی بارشوں نے ملک بھر میں تباہی مچادی تھی سب سے زیادہ نقصان سندھ میں ہوا تھا جہاں ہزاروں مکانات پانی میں بہہ گئے تھے اور لاکھوں لوگ بے گھر ہوگئے تھے اب ایک بار پھر محکمہ موسمیات کی جانب سے سندھ میں شدید بارشوں اور طوفان کی بری پیشن گوئی کردی گئی ہے -جس کے بعد پی ڈی ایم نے متعلقہ اداروں کو تیار رہنے کے لیے الرٹ اور ہدایات جاری کردیں۔محکمہ موسمیات نے 28 اپریل تا یکم مئی طوفانی بارشوں کی پیش گوئی کررکھی ہے۔ پیش گوئی کے مطابق میرپورخاص، لاڑکانہ، بدین، سانگھڑ، مٹیاری، عمرکوٹ، بدین، قمبر اور شہداد کوٹ میں طوفانی بارشوں سے طغیانی کا خدشہ ہے

 

 

 

پی ڈی ایم اے نےممکنہ بارشوں سے نمٹنے کے لیے تیار رہنے کی ہدایت جاری کرتے ہوئے کہا ہے کہ سندھ بھر کے کمشنرز اور ڈپٹی کمشنرز بارشوں سے متعلق ایمرجنسی پلان مرتب کرلیں۔محکمے کی جانب سے کہا گیا ہے کہ ممکنہ طوفانی بارشوں کے دوران سمندر میں طغیانی کے باعث عوام کو جانے سے روکا جائے۔ طوفانی بارشوں کے دوران عوام غیر ضروری طور گھروں سے باہر نہ نکلیں۔ بجلی کی کھلی تاروں سے دُور رہا جائے اور انڈر پاسز یا نشیبی علاقوں میں جانے سے احتیاط برتی جائے۔پی ڈی ایم اے کے مطابق ممکنہ طوفانی بارشوں سے سندھ بھر میں نشیبی علاقے زیرآب آنے کا خدشہ ہے۔ صوبے بھر کے تمام ہسپتالوں میں ہنگامی صورتحال سے نمٹنے کے لیے 24 گھنٹے تیاری رکھنے کی ہدایت کی گئی ہے۔ اس وارننگ کے بعد سندھ کے تمام اضلاع میں ایمرجنسی ہیلپ لائن قائم کرنے کی ہدایت کی گئی ہے، جس میں کہا گیا ہے کہ ادویات سمیت عوام کے استعمال کی ضروری اشیا ءسٹاک کرلی جائیں۔تاکہ پچھلے سال کی طرح تباہی نہ ہو اور عوام کی جان و مال محفوظ رہے –