کراچی: سندھ ہائی کورٹ (ایس ایچ سی) نے منگل کو صوبائی وزیر شرجیل انعام میمن کا نام ایگزٹ کنٹرول لسٹ (ای سی ایل) سے مستقل طور پر نکالنے کا حکم دیتے ہوئے ان کی نظرثانی کی درخواست منظور کرلی۔
تفصیلات کے مطابق پیپلز پارٹی کے رہنما شرجیل میمن اور دیگر کے خلاف محکمہ اطلاعات سندھ میں 5 ارب 75 کروڑ روپے کرپشن کیس میں صوبائی وزیر شرجیل انعام میمن کو سندھ ہائی کورٹ سے بڑا ریلیف مل گیا۔
سندھ ہائی کورٹ نے شرجیل میمن کی نظرثانی درخواست منظور کرتے ہوئے سندھ کے صوبائی وزیر کا نام ای سی ایل سے مستقل طور پر نکالنے کا حکم دے دیا۔
Image Source: The News International
جسٹس کے کے آغا کی سربراہی میں دو رکنی بنچ نے درخواست پر فیصلہ سنایا۔
راج علی واحد ایڈووکیٹ نے کہا کہ سندھ ہائی کورٹ نے ضمانت دیتے ہوئے شرجیل میمن کا نام ای سی ایل میں شامل کرنے کا حکم دیا تھا۔ شرجیل میمن کو ملک سے باہر جانے کے لیے بار بار اجازت لینا پڑتی ہے۔
وکیل نے کہا کہ شرجیل میمن ٹرائل کورٹ میں باقاعدگی سے پیش ہو رہے ہیں۔ انہوں نے عدالت سے استدعا کی کہ شرجیل میمن کا نام ای سی ایل سے مستقل طور پر نکالنے کا حکم دیا جائے۔
نیب اور وفاقی حکومت کے وکیل نے بھی شرجیل میمن کا نام ای سی ایل سے مستقل طور پر نکالنے کی حمایت کر دی ہے۔