پیپلزپارٹی کراچی کے صدر سعید غنی کا کہنا ہےکہ ن لیگ جیل میں موجود چیئرمین پی ٹی آئی پر پابندی لگانے کا مطالبہ کررہی ہے لیکن پیپلزپارٹی کسی پر پابندی کے حق میں نہیں ہے۔میڈیا سے گفتگو کرتے ہوئے سعید غنی کا کہنا تھا کہ ایک شخص علاج کرانے باہرگیا تھا، یہ جلا وطنی کا لفظ کہاں سے آگیا، تاثر دیا جارہا ہے نواز شریف کسی انڈر سٹینڈنگ کے تحت آئے ہیں، یہ بھی تاثر دیا جارہا ہے کہ نوازشریف کو وزیراعظم بنوایا جائے گا، امید ہے نوازشریف اس تاثرکی نفی کریں گے، الیکشن میں عوام جسے منتخب کرے اسے وزیراعظم بننا چاہئے۔ انہوں نے کہا کہ نگران پنجاب حکومت (ن) لیگ کی ایماء پر چل رہی ہے، تمام جماعتوں کو لیول پلئینگ فیلڈ ملنی چاہئے، کسی جماعت کو لاڈلے والی ٹریٹمنٹ نہیں ملنی چاہئے۔ یہ نہیں ہونا چاہئے (ن) لیگ کے لئے میدان الگ اور ہمارے لئے الگ ہو۔سعید غنی نے مزید کہا کہ جتنی جلدی انتخابات ہوں گے اتنی ہی جلدی ملک بحرانوں سے نکلے گا۔
