گزشتہ روز سوشل میڈیا پر ایک خبر نے ہنگامہ برپا کردیا تھا جس میں کہا گیا تھا کہ پاکستان پیپلز پارٹی کی سینئرخاتون رہنما شازیہ مری کے لاہور والے بنگلے سے 97 ارب روپے پکڑے گئے ہیں تاہم اب ان خبروں کے بارے میں بتایا گیا ہے کہ یہ خبر فیک تھی ایسا کچھ نہیں ہوا -ڈیلی پاکستان گلوبل کے مطابق شازیہ مری کے متعلق سوشل میڈیا پر ایک من گھڑت خبر پھیلائی جا رہی ہے، جس میں بتایا جا رہا ہے کہ ان کے گھر پر چھاپے کے دوران نیب نے 97ارب روپے کی خطیر رقم برآمد کی ہے۔جس کا مقصد محض ان کی کردار کشی ہے –

 

اس فیک نیوز میں بتایا جا رہا ہے کہ شازیہ مری کے گھر سے اس رقم کے علاوہ بڑی مقدار میں سونا بھی برآمدہوا ہے۔ ملک کی ایک بڑی سیاسی جماعت کے کارکنوں اور اس کے حامی صحافیوں نے بغیر تصدیق کیے اس افواہ کو بطور خبر پھیلاناشروع کر دیا تاہم بعد ازاں حقیقت سامنے آنے پر ان صحافیوں میں سے بیشتر نے اپنی سوشل میڈیا پوسٹس ڈیلیٹ کر دیں۔
کل جن تصاویر کو عوام کے ساتھ شئیر کیا تھا اور کہا گیا تھا کہ یہ شازیہ مری کے گھر سے برآمد ہوئی ہیں، یہ تصاویر نیب کے جنوری 2022ءمیں سابق میونسپل کمشنر کورنگی کراچی کے گھر پر چھاپے کے دوران پکڑی جانے والی رقم کی ہے۔شازیہ مری نے بھی اس حوالے سے ایک ٹویٹ کے ذریعے لکھا کہ ”میں اپنے متعلق پھیلائی جانے والی جھوٹی خبر بے نقاب کرنے والے تمام لوگوں کی شکرگزار ہوں۔ اس قسم کا تکلیف دہ پراپیگنڈہ صرف ایسے لوگوں کی بیمار ذہنیت کی عکاسی کرتا ہے جوا س سے بہتر کچھ کر نہیں سکتے۔