سابق وزیر اعظم اور چیئر مین پاکستان تحریک انصاف عمران خان کی بنی گالہ رہائش گاہ سے پولیس سکیورٹی ہٹالی گئی ہے – عمران خان کی بنی گالہ والی رہائش گاہ اسلام آباد پولیس کے ڈی ایس پی سمیت 70 اہلکار تعینات تھے جو مختلف شفٹوں میں ڈیوٹی سرانجام دیتے تھے۔اس فیصلے پر تحریک انصاف کی جانب سے تشویش کا اظہار بھی سامنے آیا ہے ۔پی ٹی آئی کے رہنماؤں کی جانب سے سوشل میڈیا پر جاری بیان میں کہا گیا ہے کہ سیکیورٹی تھریٹس کے بارے میں معلوم ہونے اور 3 نومبر کو ہونے والے قاتلانہ حملے کے باوجود عمران خان سے قانونی طور پر لی گئی سیکیورٹی واپس لے لی گئی، اگر عمران خان کو کچھ ہوا تو اس کے ذمہ دار وزیر داخلہ رانا ثنا اللہ ہوں گے-

پی ٹی آئی رہنما اور نامور گلوکار سلمان احمد نے سوشل میڈیا پر جاری بیان میں لکھا کہ فاشست پولیس نے ابھی کنفرم کیا ہے کہ ظالم وزیر داخلہ رانا ثنا اللہ کی ہدایات پر سابق وزیراعظم عمران خان سے ذاتی سیکیورٹی واپس لے لی گئی ہے۔
اس کے جواب میں اسلام آباد پولیس نے بھی سیکیوریٹی واپس بلوانے کی وجوہات بتاتے ہوئے کہا کہ بنی گالہ سابق وزیراعظم کی نجی رہائش گاہ ہے، سابق وزیراعظم کئی ماہ سے اسلام آباد میں مقیم نہیں ہیں، ان کی غیر موجودگی میں اسلام آباد پولیس یا دیگر صوبوں کی پولیس یہاں نہیں لگائی جا سکتی۔