نئی حکومت کی وفاقی کابینہ کو حتمی شکل دے دی گئی

نئی حکومت کے اقتدار میں آنے کے بعد ابھی تک کچن کیبینٹ کا فیصلہ نہیں ہوسکا تاہم اب بتایا جارہا ہے کہ پیپلز پارٹی نے وزارتیں لینے پر رضامندی ظاہر کردی ہے – جس کے بعد حکومت کی جانب سے وفاقی کابینہ کے حتمی ناموں پر آج رات کو کسی فیصلے پر پہنچنے کی توقع ہے کیونکہ وزیر اعظم شہباز شریف پاکستان ڈیموکریٹک موومنٹ کی قیادت کو افطار ڈنر پر مدعو کیا ہے

عشائیہ میں، وزیر اعظم ممکنہ طور پر پی ڈٰی ایم میں شامل تمام جماعتوں کا شکریہ ادا کریں گے کہ انہوں نے انہیں پاکستان کا وزیر اعظم منتخب کروانے کے لیے مل کر کام کیا

اطلاعات کے مطابق وزیراعظم شہباز شریف نے اپنی وفاقی کابینہ میں مسلم لیگ (ن) کے 12 ایم این ایز شامل کرنے کا فیصلہ کیا ہے جب کہ پیپلز پارٹی کو 7 نشستیں ملیں گی۔

ذرائع کے مطابق راجہ پرویز اشرف قومی اسمبلی کے سپیکر کے امیدوار ہیں کیونکہ اسد قیصر کی جانب سے ہفتہ کو دیر گئے مستعفی ہونے کے فیصلے کے بعد یہ عہدہ خالی ہے جبکہ جے یو آئی (ف) کا کوئی ایم این اے ڈپٹی سپیکر بن سکتا ہے – کیونکہ قاسم سوری کو بھی عدم اعتماد کی صورت میں نااہلی کا سامنا ہے۔

دریں اثنا، مسلم لیگ (ن) اور پیپلز پارٹی کے ارکان کے علاوہ، جے یو آئی-ایف کو تین وزارتیں اور ایک وزیر مملکت کا قلمدان ملے گا، ایم کیو ایم پی، بی اے پی، اور بی این پی-ایم کو دو دو وزارتیں ملیں گی۔ ذرائع نے بتایا کہ آزاد امیدواروں کو بھی وزارتیں ملنے کا امکان ہے۔

ذرائع نے بتایا کہ ایم کیو ایم پی کو سندھ، پی پی پی کو پنجاب، جے یو آئی (ف) خیبر پختونخوا اور بی این پی ایم کو بلوچستان کی گورنر شپ ملے گی۔

وزیراعظم نے کابینہ کی تشکیل پر بات کرنے کے لیے پیپلز پارٹی کے رہنماؤں آصف علی زرداری اور بلاول بھٹو زرداری، دیگر سیاستدانوں اور صحافیوں سے الگ الگ ملاقاتیں کیں۔