وفاقی وزیر داخلہ رانا ثناء اللہ نے پاکستان تحریک انصاف کے چیئرمین عمران خان کو خبردار کیا ہے کہ وہ پنجاب اسمبلی کی 20 نشستوں کے لیے ہونے والے ضمنی انتخابات کے دوران بدامنی نہ پھیلائیں اگر ایسا ہوا تو قانون حرکت میں آئے گا ۔
وزیر داخلہ نے کہا کہ عمران خان الیکشن ہار چکے ہیں، ڈسکہ کی طرز کی دھاندلی کی گئی تو پی ٹی آئی انجام بھگتے گی ۔ انہوں نے مزید کہا کہ ہم آزادانہ اور شفاف ضمنی انتخابات کو یقینی بنائیں گے۔
رانا ثناء اللہ نے کہا کہ ان کے پاس اطلاعات ہیں کہ پی ٹی آئی نے ضمنی انتخابات کے دوران بدامنی پھیلانے کے لیے 500 غنڈے پنجاب بلائے ہیں اور پی ٹی آئی کی جانب سے پولنگ ایجنٹس کو حلقوں سے باہر تعینات کرنے کی درخواست بھی اسی سازش کا حصہ تھی۔
مسلم لیگ ن کے رہنما نے یہ بھی دعویٰ کیا کہ اسد قیصر، علی محمد خان، مراد سعید غنڈوں کو پناہ دے رہے ہیں۔ انہوں نے خبردار کیا کہ جو بھی قانون ہاتھ میں لے گا اس کے خلاف کارروائی کی جائے گی۔