ملک میں بارش اور طوفان سے 8 افراد جاں بحق ؛40 زخمی

لاہور سمیت مختلف شہروں میں آندھی، طوفان اور بارش سے کروڑوں افراد کے مرجھائے چہرے تو کھل اٹھے مگر یہ بارش کچھ گھرانوں کو زندگی بھر کا غم بھی دے گئی ،باش اور طوفان کے سبب حادثات میں 8 افراد جان کی بازی ہار گئے۔
صوبائی دارالحکومت لاہور سمیت قصور، جہلم، سرگودھا، بھکر، پھالیہ، کالا باغ، خوشاب اور دیگر شہروں کے ساتھ ساتھ خیبر پختونخوا کے مختلف علاقوں ، پشاور، پٹن، مالم جبہ، پارا چنار، بالا کوٹ، کالام میں بارش سے موسم خوشگوار ہو گیا۔ جبکہ سندھ اور بلوچستان میں گرمی کی شدید لہر برقرار ہے، سبی میں درجہ حرارت47 ڈگری ریکارڈ کیا گیا جبکہ موہنجو دڑو، شہید بینظیر آباد اور دادو میں پارا45 ڈگری سینٹی گریڈ تک پہنچ گیا ۔ پنجاب کے 2 شہروں میں آسمانی بجلی جبکہ دیگر شہروں میں دیواریں گرنے کے مختلف واقعات میں8 افراد جاں بحق ے جبکہ40 زخمی ہوگئے ۔
خوشاب پیل میں آسمانی بجلی گرنے سے 2 بھائی چل بسے اور ان کا والد شدید زخمی ہو گیا، ڈی آئی خان میں گھر پر آسمانی بجلی گرنے سے خاتون دم توڑ گئی جبکہ گوجرانوالہ میں تیز آندھی سے دیوار اور چھت گرنے سے لڑکی سمیت3 افراد جان کی بازی ہار گئے۔وزیر آباد میں دیوار گرنے سے ماں بیٹی ملبے تلے دب کر چل بسیں، بھیرہ، کبیر والا، سیالکوٹ میں آندھی کے باعث مختلف حادثات میں37 افراد زخمی ہوئے ہیں جبکہ چنیوٹ میں آسمانی بجلی گرنے سے 10 سے زائد جانور ہلاک ہو گئے۔
دوسری جانب وزیر اعلیٰ پنجاب مریم نواز شریف نے طوفانی بارشوں کے دوران مختلف واقعات میں قیمتی انسانی جانوں کے ضیاع پر افسوس کا اظہار اور سوگوار خاندانوں سے اظہار تعزیت و ہمدردی کرتے ہوئے زخمی افراد کے بہترین علاج کی ہدایت کی۔وزیر اعلیٰ پنجاب مریم نواز شریف نے طوفانی بارشوں کے دوران پی ڈی ایم اے، واسا اور دیگر اداروں، انتظامیہ کو مستعد اور متحرک رہنے کا حکم بھی دیا ہے۔