پاکستان ،بابر اعظم اور شاہین شاہ آفریدی نمبر ون کی پوزیشن سے محروم

بابر اعظم کی 900 روز سے زیادہ ون ڈے پر حکمرانی کا راج ختم ہوگیا -ورلڈ کپ میں ان کی کارکردگی اتنی متاثر کن نہیں رہی جس کی ان سے توقع کی جارہی تھی -اس کے علاوہ پاکستان ون ڈے میں بھی نمبر 1 کی پوزیشن سے محروم ہوگیا -شاہین شاہ آفریا ساؤتھ افریقی سے 90 رن کھانے کے بعد پانچویں نمبر پر پہنچ گئے -انٹر نیشنل کرکٹ کونسل نے ون ڈے کی نئی رینکنگ جاری کر دی ہے ، جس کے مطابق بھارتی کھلاڑی شبمن گل نے قومی ٹیم کے کپتان بابراعظم سے پہلی پوزیشن چھین لی جبکہ گلین میکسویل نے آل راونڈرز کی فہرست میں لمبی چھلانگ لگاتے ہوئے چھٹی پوزیشن حاصل کر لی ۔
تفصیلات کے مطابق قومی ٹیم کے کپتان بابراعظم اڑھائی سال تک ون ڈے رینکنگ میں پہلی پوزیشن پر براجمان رہے جو کہ اب محض 6 پوائنٹس کے فرق سے شبمن گل نے چھین لی ہے ، بابراعظم 824 پوائنٹس کے ساتھ دوسرے اور شبمن گل 830 پوائنٹس کے ساتھ پہلے نمبر پر براجمان ہو گئے ہیں ۔
بیٹنگ کے شعبے میں تیسرے نمبر پر جنوبی افریقہ کے کوئنٹن ڈی کاک ، چوتھے پر ویرات کوہلی، پانچویں پر ڈیوڈ وانر، چھٹے پر روہت شرما، ساتویں پر راسی وان ڈیر ڈوسن ، آٹھویں پر آئرلینڈ کے ہیری ٹیکٹر ، نویں پر ہنرچ کلاس اور دسویں نمبر پر انگلینڈ کے ڈیوڈ ملان موجود ہیں ۔ فخر زمان 11 ویں نمبر پر موجود ہیں تاہم امام الحق کی تنزلی ہوئی ہے اور ان سے 12 ویں پوزیشن افغانستان کے سینچری کرنے والے ابراہیم زردان نے چھینتے ہوئے انہیں 13 ویں نمبر پر دھکیل دیا ہے ۔
باولنگ کے شعبے میں بھارتی باولر محمد سراج 709 پوائنٹس کے ساتھ پہلی پوزیشن پر موجود ہیں ، کیشو مہاراج دوسری ، ایڈم زیمپا تیسری ، کلدیپ یادیو چوتھی ، پاکستان کے شاہین شاہ آفریدی پانچویں، جوش ہیزل وڈ چھٹی پوزیشن پر ہیں۔ افغانستان کے راشد خان نے ایک درجہ ترقی کرتے ہوئے ساتویں پوزیشن حاصل کر لی ہے جبکہ جسپریت بمراہ تنزلی کے بعد آٹھویں نمبر پر چلے گئے ہیں، ٹرینٹ بولٹ ترقی کرتے ہوئے نویں نمبر پر آ گئے ہیں۔بھارت کے محمد شامی ورلڈ کپ میں شاندار کارکردگی دکھا کر 10 پوزیشن پر آگئے ۔
آل راونڈرز کی فہرست میں بنگلہ دیش کے شکیب الحسن 327 پوائنٹس کے ساتھ پہلے نمبر پر ہیں -پاکستان کا کوئی آل راؤنڈر ٹاپ 10 میں بھی جگہ بنانے میں کامیاب نہیں ہوسکا –