پاکستان کے چپے چپے کی حفاظت کی قسم کھانے والے پاک فوج کے 4 جوان آج خیبر ایجنسی کے علاقے تیمر کرہ میں دشمن کےساتھ جواںمردی سے لڑتے ہوئے شہید ہوگئے-شہداء میں ٹیم لیڈر 43 سالہ لیفٹیننٹ کرنل محمد حسن حیدر کا تعلق اسلام آباد سے تھا ،دیگر 3 شہداء میں لکی مروت کے 31 سالہ نائیک خوشدل خان، چارسدہ کے 27 سالہ نائیک رفیق خان اور مری کے 33 سالہ لانس نائیک عبدالقادر شامل ہیں۔
سکیورٹی فورسز نے دہشتگردوں کی موجودگی کی اطلاع پر ضلع خیبر کے علاقے تیراہ میں انٹیلی جنس بیسڈ آپریشن کیا۔پاک فوج کے شعبہ تعلقات عامہ کے مطابق آپریشن کے دوران تین دہشت گرد بھی واصل جہنم ہوئے جبکہ تین زخمی ہوئے۔آپریشن کے دوران لیفٹیننٹ کرنل محمد حسن حیدر کی قیادت میں سکیورٹی اہلکاروں نے خفیہ اطلاع پر آپریشن کیا اور دہشت گردوں کے ٹھکانے کو مؤثر انداز میں نشانہ بنایا تاہم شدید فائرنگ کے تبادلے کے دوران وطن کے 4سپوت بہادری سے لڑتے ہوئے شہید ہوگئے۔
آئی ایس پی آر کے مطابق علاقے میں ممکنہ طور پر موجود کسی بھی دہشتگرد کے خاتمے کے لئے سینی ٹائزیشن آپریشن کیا گیا۔ترجمان پاک فوج نے ایک بار پھر اسی عزم کا اعادہ کیا کہ ہمارے جوان سکیورٹی فورسز دہشتگردی کی لعنت کے خاتمے کیلئے پرعزم اور چوکس ہیں اور بہادر جوانوں کی یہ قربانیاں ہمارے عزم کو مزید مضبوط کرتی ہیں۔آخری دہشت گرد تک یہ جنگ جاری رہے گی اور ارض پاک کو ان ناسوروں سے پاک کرکے دم لیں گے –
