جب سے سپریم کورٹ کی جانب سے فل کورٹ کا فیصلہ آیا ہے اس پر مختلف افراد مختلف رائے دے رہے ہیں -بعض صحافیوں اور وکلاء کا خیال ہے کہ کل کے فیصلے کے بعد نواز شریف کا سیاسی مستقبل داؤ پر لگ گیا ہے – اس پر اب مسلم لیگ کے سابق وزیر قانون کا موقف بھی سامنے آگیا ہے –
سابق وفاقی وزیر قانون اعظم نذیر تارڑ نے کہا ہے کہ قائد ن لیگ نواز شریف کی نااہلی سپریم کورٹ کی آبزرویشن کے بعد ختم ہوگئی ہے۔انھوں نے نواز شریف کو کلین چٹ دیتے ہوئے کہا کہ نواز شریف پر لگی پابندیاں ختم ہوگئیں -اب وہ الیکشن بھی لڑیں گے اور اگلی مرتبہ پھر وزیراعظم کا عہدہ سنبھالیں گے –
اعظم تارڑ نے سپریم کورٹ کے کل کے فیصلے پر خوشی اور اطمنان کا اظہار کرتے ہوئے کہا کہ پارلیمان کے بنائے ہوئے قانون کی حوصلہ افزائی ہوئی ہے، سپریم کورٹ نے اس بات کا احاطہ کیا ہے کہ قانون سازی کرنا پارلیمنٹ کا اختیار ہے۔ سپریم کورٹ نے اس قانون کو برقرار رکھا ہے۔
اعظم نذیر تارڑ کا کہنا ہے کہ اپیل کے معاملے پر سپریم کورٹ نے بھی اپنا مختلف فیصلہ دیا ہے ، الیکشن ایکٹ میں ترمیم کے بعد نواز شریف کے معاملے پر یہ اپیل اتنی اہم نہیں ہے، الیکشن ایکٹ میں ترمیم کے بعد تاحال وہ معاملہ چیلینج نہیں ہوا اور وہ رائج الوقت ہے۔ انہوں نے کہا کہ نواز شریف کی نااہلی سپریم کورٹ کی ابزرویشن کے بعد ختم ہوگئی ہے، نااہلی کے حوالے سے الیکشن ایکٹ میں ترمیم کے بعد نواز شریف اب اہل ہیں جبکہ باقی نیب سے متعلق جو نواز شریف کے کیسز ہیں جب نواز شریف وطن واپس لوٹیں گے تو میرٹ پر انہیں دیکھا جائے گا۔جبکہ اعتزاز احسن کا کہنا تھا کہ کل کے سپریم کورٹ کے فیصلے کے بعد نواز شریف تاحیات نااہل ہی رہیں گے –
