ثقلین مشتاق نجی ٹی وی کے پروگرام میں شریک ہوئے پروگرام کے دوران میزبان مومن ثاقب نے ثقلین مشتاق سے کہا اپنے داماد شاداب خان کو کوئی پیشہ ورانہ مشورہ دیں تو اس پر ثقلین مشتاق نے شاداب کی تعریف کی اور کہا کہ شاداب محنتی بچہ ہے اسے چاہیے کہ محنت کرتا رہے لیکن محنت دو طرح کی ہوتی ہے، میرے والد کہتے تھے تم گرا ؤنڈ میں چاہے کتنی بھی محنت کرلو جب تک تم اچھے انسان نہیں بنو گے تمہارا دل اچھا نہیں ہوگا سوچ اچھی نہیں ہوگی تب تک تمہاری کوئی بھی مدد نہیں کرسکے گا۔ ثقلین مشتاق کا کہنا تھا کہ یہ مشورہ شاداب کیلئے نہیں بلکہ سب ہی بچوں کیلئے ہے آپ خوب محنت کرو لیکن اچھے انسان بنو۔

 

دوسری جانب کپتان بابر اعظم سے متعلق سابق کرکٹر کا کہنا تھا کہ بابر کیلئے دعا ہے کہ اللہ اسے بری نظر سے بچائے، کوئی کچھ بھی کہے لیکن بابر کی کپتانی کا فیصلہ اوپر سے آیا ہے۔ انہوں نے مزید کہا کہ بابر کے مزاج کی بات کروں تو گراؤنڈ کے باہر بھی بابر سب کے ساتھ بہت اچھا ہے، ہمارے زمانے میں سینئر جونیئر اور کپتان کی الگ جگہیں ہوتی ہیں لیکن بابر سب کو ساتھ لے کر چلتا ہے، بابر میں غرور نہیں، اسے یہ نہیں کہ وہ کسی جونیئر کے ساتھ کھانا نہیں کھائے گا بیٹھے گا نہیں یہ وہ ، وہ کسی بھی جونیئر کے ساتھ کھالیتا ہے اور کسی کے ساتھ بھی بیٹھ جاتا ہے ۔