انڈین پریمیئر لیگ میں میچ کے دوران تلخ کلامی کرنے پر لکھنو سپر جائنٹس کے مینٹور اور سابق بھارتی کرکٹر گوتم گمبھیر اور رائل چیلنجرز بنگلور کے ویرات کوہلی پر جرمانہ عائد کردیا گیا۔بھارتی میڈیا کے مطابق میچ آفیشلز کی جانب سے ویرات کوہلی اور گوتم گمبھیر پر میچ فیس کا 100 فیصد جرمانہ عائد کیا گیا ہے جو آئی پی ایل کے ضابطہ اخلاق کی خلاف ورزی پر جرمانہ عائد کیا گیا۔ میچ کے دوران لکھنو کے بیٹر نوین الحق اور بنگلور کے فیلڈ ر ویرات کوہلی کے درمیان تکرار شروع ہوئی تھی تاہم امپائر اور ساتھی بیٹر بیچ میں آگئے۔اور معاملہ رفع دفع ہوگیا –

 

مگرجیسے ہی رائل چیلنجرز بنگلور نے لکھنو کو شکست دی تو میچ کے آخر میں دونوں ٹیموں کے کھلاڑیوں کے آپس میں ہاتھ ملانے کے دوران نوین الحق اور ویرات کوہلی کے درمیان ایک بار پھر تلخ کلامی ہوگئی ۔ بات نے جھگڑے کی صورت اختیار کی تو نوین الحق کے بعد لکھنو سپر جائنٹس کے گوتم گمبھیر بھی ویرات کوہلی سے الجھ پڑے۔میچ ختم ہونے کے بعد لکھنو سپر جائنٹس کے بیٹر کائل میئرز کوہلی سے گفتگو کررہے تھے کہ گمبھیر نے اچانک انہیں پیچھے کھینچا اور کوہلی سے بات کرنے سے روک دیا۔ایسے میں ویرات کوہلی کی جانب سے بھی جملے کسے گئے تو گوتم گمبھیر بھی غصے میں آگئے اور ویرات کوہلی سے تلخ کلامی کرنے لگے، تاہم دونوں ٹیموں کے کھلاڑیوں نے بیچ بچاؤ کروایا۔تاہم بعد میں دونوں کھلاڑیوں نے اپنی غلطی کا اعتراف کرلیا ور اس بات پر آمادگی ظاہر کی کہ ان سے غلطی سرزد ہوئی ہے اس لیے وہ اپنے اس برے عمل پر جرمانے کی سزا بھگتیں گے اور جرمانہ ادا کریں گے