�
امریکہ میں 439لوگوں سے بیماری کے بہانے 37ہزار ڈالر جو پاکستان میں تقریباً 96لاکھ 63ہزار روپے بنتے ہیں ، ہتھیانے والی 19سالہ لڑکی میری روسو کو گرفتار کر لیا گیا۔ میل آن لائن کے مطابق میڈیسن میری روسو نامی اس لڑکی نے کینسر کی مریض ہونے کا ڈرامہ کیا اور علاج کے لیے آن لائن چندہ اکٹھا کرنا شروع کر دیا۔ وہ اپنے ٹک ٹاک اکاﺅنٹ پر ایسی ویڈیوز بھی پوسٹ کرتی تھی جس میں اسے ٹیوبز لگی ہوتی تھی اور وہ ٍٰ فیک ڈاکٹروں کے جھرمٹ میں ہوتی تھی۔ اس کی ان ویڈیوز کو دیکھ کر لوگ اسکی امداد کرتے رہتے تھے
میڈیسن میری روسو نے انٹرنیٹ پر اپ لوڈ کرنے والی ان ویڈیوز میں درد دل رکھنے والے لوگوں کو بتایا کہ اسے پینکریاٹک کینسر اور ایکیوٹ لمفوبلاسٹک لیوکیمیا جیسی خوفناک بیماریاں لاحق ہیں اوراس کی ریڑھ کی ہڈی میں فٹ بال کے سائز کا ٹیومر بن چکا ہے، اس نے اپنی دردمندانہ اپیل میں کہا تھا کہ اگر اس کا فوری علاج نہ ہوا تو وہ مر جائے گی ۔ روسو کی ان تکلیف دہ ویڈیوز کی وجہ سے بھی لوگوں نے اس کی باتوں کا اعتبار کیا اوراسے 439لوگوں نے 37ہزار ڈالر کی رقم چندے کے طور پر دے دی۔ تاہم اس کا یہ جھوٹ پکڑا گیا اور پولیس نے اس کے فلیٹ پر چھاپہ مار کر اسے گرفتار کرلیا – جہاں سے وہ تمام طبی سازو سامان برآمد ہو گیا جس کے ساتھ وہ تصاویر اور ویڈیوز بنا کر آن لائن پوسٹ کرتی تھی اور لوگوں کو بےوقوف بنا کر ٹھگ لیتی تھی ۔اس کے ’گو فنڈ می‘ پلیٹ فارم پر بنائے گئے اکاﺅنٹ کے مطابق اب تک سینکروں لوگ اسے 37ہزار 303ڈالر چندہ دے چکے تھے۔
