کراچی: پاکستان میں پہلی ڈیجیٹل مردم شماری کے آغاز سے قبل کراچی کے اساتذہ میں ٹیبلٹ تقسیم کیے گئے۔
تفصیلات کے مطابق پاکستان میں پہلی اور مجموعی طور پر ساتویں ڈیجیٹل مردم شماری کے لیے تربیت مکمل کرنے والے اساتذہ میں ٹیبلٹ تقسیم کیے گئے۔
Image Source: ARY News
آئندہ عام انتخابات ڈیجیٹل مردم شماری کی بنیاد پر ہوں گے، جس کے لیے پاکستان بیورو آف شماریات (پی بی ایس) کے تحت کراچی سمیت سندھ کے مختلف اضلاع میں اساتذہ کو تربیت دی جا رہی ہے۔
گورنمنٹ بوائز سیکنڈری سکول انجمن اسلامیہ لیاقت آباد میں ٹریننگ میں حصہ لینے والے اساتذہ میں ٹیبلٹس تقسیم کی گئیں۔
مردم شماری کی نگران اور ماسٹر ٹرینر امبر سلطانہ نے اے آر وائی نیوز سے گفتگو کرتے ہوئے کہا کہ ڈیجیٹل مردم شماری کے لیے تربیتی مرحلہ 21 جنوری تک جاری رہے گا، اور مردم شماری کا عمل یکم فروری سے شروع ہوگا۔
پاکستان کی تاریخ میں پہلا موقع ہوگا کہ مردم شماری میں کاغذ اور قلم استعمال نہیں کیا جائے گا، ادارہ شماریات اور تربیت یافتہ عملہ ڈیٹا کو ٹیبلیٹ میں فیڈ کرے گا۔