اسلام آباد: کابینہ کی اقتصادی رابطہ کمیٹی (ای سی سی) نے یوٹیلیٹی اسٹورز کارپوریشن (یو ایس سی) کو سیلاب زدہ علاقوں میں اشیائے ضروریہ کی فراہمی کو یقینی بنانے کے لیے 540 ملین روپے کی منظوری دے دی ہے۔
تفصیلات کے مطابق وزیر خزانہ مفتاح اسماعیل کی زیر صدارت ای سی سی کے اجلاس میں سیلاب زدہ علاقوں میں اشیائے ضروریہ کی فراہمی کو یقینی بنانے کے لیے یوٹیلیٹی اسٹورز کے لیے 540 ملین روپے کی ہنگامی گرانٹ کی منظوری دی گئی۔
Image Source: BR
اجلاس میں پاسکو کی گندم کی تمام وصول کنندگان کے درمیان مقامی اور درآمد شدہ 50 فیصد کے تناسب سے فراہمی کی بھی اجازت دی گئی۔ تاہم یو ایس سی کو 75 فیصد مقامی اور 25 فیصد درآمدی گندم فراہم کی جائے گی۔
فورم نے نیشنل ڈیزاسٹر مینجمنٹ اتھارٹی (این ڈی ایم اے) کو پاکستان بھر میں آفات سے متاثرہ آبادیوں کے بچاؤ، امداد اور بحالی کے اخراجات کو پورا کرنے کے لیے 3 ارب روپے کی منظوری دی۔
افغانستان میں تین پاکستانی ہسپتالوں کے عملے کے اخراجات اور تنخواہ کے لیے ایک ارب روپے سے زائد کی فنڈنگ کی بھی منظوری دی گئی۔
دریں اثنا، ای سی سی نے ٹریڈنگ کارپوریشن آف پاکستان (ٹی سی پی) کو آئندہ ربیع سیزن کے لیے حکومت سے حکومتی بنیادوں پر 300,000 میٹرک ٹن یوریا کی درآمد کے لیے عمل شروع کرنے کی اجازت بھی دی۔
ایک دن پہلے، نیشنل ڈیزاسٹر اینڈ منیجمنٹ اتھارٹی (این ڈی ایم اے) نے شیئر کیا تھا کہ ملک میں مون سون کے اسپیل اور سیلاب سے گزشتہ 24 گھنٹوں میں کم از کم 18 مزید افراد اپنی جانیں گنوا بیٹھے ہیں اور صوبہ سندھ سب سے زیادہ متاثر ہوا ہے۔
این ڈی ایم اے کی رپورٹ میں بتایا گیا کہ 18 اموات میں سے 14 سندھ میں، دو پنجاب میں اور ایک ایک آزاد جموں و کشمیر اور خیبر پختونخوا میں رپورٹ ہوئی۔ اس نے کہا، “مجموعی طور پر مرنے والوں کی تعداد 1,343 تک پہنچ گئی ہے جب کہ سیلاب میں 12,720 لوگ زخمی ہوئے ہیں۔”
