کراچی: محکمہ بلدیات سندھ کی بجلی گزشتہ تین دنوں سے منقطع ہے کیونکہ چوروں نے مبینہ طور پر پی ایم ٹی سے محکمہ کو بجلی فراہم کرنے والی 25 میٹر لمبی مین تار چوری کر لی ہے۔
ذرائع کا کہنا ہے کہ محکمہ بلدیات سندھ کی بجلی گزشتہ تین روز سے منقطع ہے جس کے باعث سیکریٹری بلدیات سندھ اور دیگر افسران نے اپنے اپنے دفاتر میں آنا بند کردیا ہے۔
محکمہ میں کام کرنے والا عملہ اور محکمہ میں آنے والے لوگوں کو اس گرم اور مرطوب موسم میں بجلی کی عدم دستیابی کی وجہ سے شدید مشکلات کا سامنا ہے۔
معلوم ہوا ہے کہ پی ایم ٹی سے محکمہ کو بجلی فراہم کرنے والی 25 میٹر لمبی بجلی کی مین تار نامعلوم چور چوری کر کے لے گئے۔