پاکستان نے ہفتے کے روز کابل میں سکھوں کے گوردوارے پر ہونے والے دہشت گردانہ حملے کی شدید مذمت کی ہے، جس کے نتیجے میں قیمتی جانوں کے ضیاع اور متعدد افراد کے زخمی ہونے کی اطلاعات ہیں جب کہ املاک کو نقصان پہنچا ہے۔
ایک پریس ریلیز میں دفتر خارجہ کے ترجمان عاصم افتخار نے کہا کہ پاکستان کو افغانستان میں عبادت گاہوں پر دہشت گردی کے حالیہ حملوں پر شدید تشویش ہے۔
جمعہ کے روز، دہشت گردوں نے قندوز میں امام صاحب مسجد کو نشانہ بنایا، جس میں متعدد نمازی ہلاک اور زخمی ہوئے۔
مذہبی مقامات کو نشانہ بنانے والی دہشت گردی کی یہ کارروائیاں سراسر نفرت انگیز ہیں۔
انہوں نے کہا کہ پاکستان ہر قسم کی دہشت گردی کی مذمت کا اعادہ کرتا ہے۔
ترجمان نے افغانستان کے عوام کے ساتھ بھرپور یکجہتی کا اظہار کرتے ہوئے کہا کہ ہم دہشت گردی کی لعنت سے لڑنے اور اپنے تمام شہریوں کے تحفظ کو یقینی بنانے کے لیے افغان حکام کی تمام کوششوں کی حمایت کرتے ہیں۔