آرمی چیف جنرل قمر جاوید باجوہ نے بل اینڈ میلنڈا گیٹس فاؤنڈیشن کے شریک چیئرمین بل گیٹس کی پاکستان میں پولیو کے خاتمے کے لیے کی جانے والی کوششوں کو سراہتے ہوئے انہیں تعاون جاری رکھنے کی یقین دہانی کرائی۔
ایک ٹیلی فونک گفتگو میں، آرمی چیف اور بل گیٹس نے جامع پولیو کے خاتمے اور کے لیے پاکستان کے عزم سے متعلق امور پر تبادلہ خیال کیا۔
بلگیٹس نے قومی پولیو مہم کی حمایت، مناسب رسائی اور کوریج کو یقینی بنانے پر پاک فوج کو بھی سراہا۔
بل گیٹس نے وسائل کی کمی کے باوجود کرونا وبا کے خلاف پاکستان کی سمارٹ لاک ڈاؤن کی حکمت عملی کو بھی سراہا۔
آرمی چیف نے کامیابی کا سہرا ایک حقیقی قومی ردعمل کو قرار دیا، جسے این سی او سی کے طریقہ کار کے ذریعے عمل میں لایا گیا جس نے وسائل کو بہتر بنانے کی اجازت دی۔
جنرل قمر جاوید باجوہ نے کہا کہ یہ ایک قومی مقصد ہے اور اس کا کریڈٹ اس عمل میں شامل تمام افراد کو جاتا ہے جو اپنی جان خطروں میں ڈال کر، گھر گھر جاکر پولیو کے قطرے بچوں کو پلاتے ہیں اور ان کی زندگی محفوظ بناتے ہیں ۔