وزیر داخلہ شیخ رشید احمد نے کہا ہے کہ نادرا دفاتر کا نیٹ ورک ملک کے دور دراز علاقوں تک پھیلا دیا جائے گا۔
بدھ کو اسلام آباد میں میڈیا سے گفتگو کرتے ہوئے انہوں نے کہا کہ اندرون سندھ میں تیرہ پاسپورٹ دفاتر قائم کیے جائیں گے جب کہ جانشینی کا سرٹیفکیٹ آزاد کشمیر اور بلوچستان میں بھی متعارف کرایا جائے گا۔
وزیر داخلہ نے کہا کہ تمام سول آرمڈ فورسز کی تنخواہوں میں پندرہ فیصد اضافہ کیا گیا ہے اور انہوں نے وزیراعظم سے دیگر محکموں کی تنخواہوں میں بھی اضافہ کرنے کی درخواست کی ہے۔
شیخ رشید نے کہا کہ ایرانی وزیر داخلہ بھی اگلے ہفتے پاکستان کا دورہ کر رہے ہیں۔
ایک سوال کے جواب میں شیخ رشید نے کہا کہ وزیراعظم عمران خان کو اپوزیشن جماعتوں کی طرف سے کوئی خطرہ نہیں جو تحریک عدم اعتماد کا انتخاب کریں تو انہیں شکست کا سامنا کرنا پڑے گا۔