وزیراعظم عمران خان نے ملک میں معدنیات کی ترقی کو تیز کرنے کے لیے وفاق اور صوبوں کے درمیان مربوط کوششوں کی ضرورت پر زور دیا ہے۔
اسلام آباد میں معدنی ترقیاتی فریم ورک کے حوالے سے ایک اجلاس کی صدارت کرتے ہوئے انہوں نے کہا کہ بڑی صلاحیتوں سے مالا مال ہونے کے باعث معدنیات کا شعبہ سرمایہ کاری کے لیے اچھا منافع فراہم کرتا ہے۔
وزیر اعظم نے کہا کہ معدنیات کا شعبہ ملک کی مجموعی معاشی نمو میں بھی حصہ ڈال سکتا ہے۔
انہوں نے ہدایت کی کہ معدنی ترقیاتی فریم ورک کے اہداف مقررہ وقت کے اندر مکمل کیے جائیں۔
اجلاس کو بتایا گیا کہ فی الحال معدنیات کا شعبہ جی ڈی پی میں ایک فیصد سے بھی کم حصہ ڈالتا ہے اور اسٹریٹجک پلان پر عملدرآمد اگلے 15 سالوں میں معدنیات کا حصہ دس فیصد تک بڑھا دے گا۔
یہ منصوبہ وفاقی اور صوبائی کوششوں میں ہم آہنگی ، تکنیکی رسائی ، ڈیٹا بیس کی ترقی ، مالی مراعات ، مقامی انسانی وسائل کی تربیت اور قانونی فریم ورک پر مشتمل ہے۔