وزیراعظم عمران خان کا سر سبز پاکستان کے حوالے سے اگلا قدم
رکھ جھوک جنگل پاکستان کا سب سے پہلا سمارٹ جنگل ہو گا۔ وزیراعظم پاکستان عمران خان نے اس جنگل کا افتتاح کر دیا۔ لاہور کے علاقے ٹھوکر نیاز بیگ کے قریب راوی دریا پر لگائے جانے والے اس جنگل میں ایک کروڑ درخت لگائے جائیں گے اور یہ جنگل 3071 ایکڑ پر مشتمل ہو گا۔دریا کنارے بنائے جانے والے اس جنگل میں واکنگ ٹریکس بنائے جائیں گے، پھلوں کے باٖغات لگائے جائیں گے، اس کے علاوہ اس میں بوٹینیکل گارڈنز اور ریور پارکس بھی شامل ہوں گے۔
اس کے علاوہ یہ جنگل مختلف جگہوں سے ہجرت کر کے آنے والے 13 قسم کے پرندوں کا بھی گھر ہو گا۔
ماحولیاتی آلودگی جس رفتار سے ہمارے خطے پر اثر انداز ہو رہی ہے ایسے اقدامات نہ صرف اس میں واضح کمی لائیں گے بلکہ انگزائٹی اور ڈپریشن کے مریض لوگوں کو، دفتری کاموں سے تھکے ہوئے عوام کو اور گھروں کےحبس سے گھبرائے ہوئے نفوس کو تفریح بھی فراہم کریں گے۔
ایوب خاور نے اس کیفیت کو بیان کرتے ہوئے لکھا ہے
جنگل جنگل اڑنے والے سب موسم
اور ہوا کا سبز دوپٹہ تیرے نام
ایسی شادابی سے نہ صرف انسانوں بلکہ پرندوں اور حشرات الارض کو بھی خدا کی بنائی ہوئی اس کائنات میں سانس آئے گی۔
اس پراجیکٹ کی وجہ سے ہمارے ملک میں زراعت کے شعبے کو بھی فروغ ملے گا اور انڈسٹریلائزیشن کے زہر نے ان فضاؤں کو جتنا آلودہ کیا ہے اس میں بھی کمی آئے گی۔لوگ جو ہم شکل مکانوں میں رہنے کے عادی ہیں اب گھروں سے باہر نکلیں گے۔ وزیراعظم عمران خان کا ٹورازم کا دیرینہ خواب بھی اس شکل میں پورا ہو رہا ہے۔ ملک میں سیاحت کو فروغ دینے کے حوالے سے بھی حکومت مین جوش و خروش اور جذبہ پایا جا رہا ہے۔